Piparkökuhúsagerð í matreiðslu

Nemendur í matreiðsluvali á unglingastigi hófu það verkefni að hanna og búa til piparkökuhús þann 23. nóvember. Skiptu þeir sér í fjóra tveggja manna hópa, tveir hópanna ákváðu að gera hefðbundin piparkökuhús en hinir vildu reyna að búa til bíla.

Nemendur voru bjartsýnir og spenntir fyrir verkefninu og var strax byrjað að hanna húsin og bílana.

Nemendur komust þó ekki lengra en það að ná að hnoða í deigið og baka örfáa hluta í húsin ásamt því að vera með alveg nóg af fíflalátum.

Í næsta tíma, þann 30. nóvember, var baksturinn kláraður, þó að það hafi uppgötvast að gleymdist  að baka hitt og þetta hjá sumum en það bjargaðist - þó ótrúlegt sé, miðað við allan þann hamagang og vesen sem fylgdi nemendum og bakstrinum.

Í næsta tíma þá nefndi kennarinn að þeir sem ekki hefðu náð að klára piparkökuhúsin skyldu halda áfram og klára þau. Hún fékk þvert nei við því þar sem þolinmæðin og ánægjan var alveg horfin við þetta vandasama verk. Í staðinn endaði tíminn í eintómum súkkulaðiklessum, bókstaflega, og munu nemendur í heimilsfræði líklegast aldrei aftur koma nálægt matarlími eftir ekki svo góða tilraun að súkkulaðimús.

Nemendur komust að því við þessa furðulegu tilraun til að búa til piparkökuhús að hliðarnar bakast ekkert endilega jafn stórar. Það er ekki það einfaldasta í heimi að setja saman piparkökuhús þannig að það passi og sé ekki skakkt og skælt.

Margrét Ásgerður, 10. bekk

Jólatónleikar Tónlistarskóla A-Hún

Jólatónleikar tónlistarskólans í Austur Húnavatnssýslu fyrir nemendur á Blönduósi verða haldnir í dag, 8. desember, í Blönduóskirkju.

Tónleikarnir fyrir krakkana í Húnavallaskóla voru haldnir 4. desember, og verða haldnir tónleikar í Hólaneskirkju fyrir nemendurna á Skagaströnd 9. Desember. Að lokum verða haldnir tónleikar í Blönduóskirkju fyrir söngdeild tónlistarskólans 10. desember.

Það eru margir nemendur í tónlistarskólanum, en þetta árið voru það svo margir að ekki gátu allir komist að sem vildu.

Mjög stór hluti nemenda Grunnskólans á Blönduósi er í námi þar, hvort sem það er hljóðfæra- eða söngnám. T.d. er næstum því helmingur nemenda í unglingadeildinni í einhvers lags tónlistarnámi.

Nemendurnir sem að spila eru oft alveg rosalega stressaðir fyrir því að spila á tónleikunum, en gera það samt, og hafa flestir mjög gaman af þessu, bæði þeir sem koma fram, og þeir sem horfa á.

Nemendurnir eru líka oft settir saman í eins konar hljómsveitir, og spila þá með öðrum krökkum.

Það finnst sumum auðveldara og minna stressandi. Einnig er oft skemmtilegra að hlusta á þannig.  

Sindri Rafn, 10. bekk

Undankeppni Samfés í Skjólinu

Skjólið hélt undankeppni samfés 2009 4. desember síðastliðinn. Þar kepptu þrír keppendur, það voru þær Guðbjörg í 10. bekk með lagið „Við Gróttu" með Bubba, Dagbjört í 8. bekk með lagið „Ó, María" og siðan var það Margrét Ásgerður í 10. bekk með lagið „Fame" úr leikritinu Fame sem skólinn sýndi á síðustu árshátíð og fór hún með sigur í keppninni.

Dómarar voru Þórhallur Bárðarson og Sigríður Sif. Keppnin var haldin á sama tíma og sleepoverið var í Skjólinu.

Margrét Ásgerður mun þá keppa í stærri undankeppni á Akureyri 29. janúar (heldur hún).  Síðan í lokin verður aðalkeppni samfés í Reykjavík, líklega í febrúar.

Guðbjörg, 10. bekk

Draumaraddir norðursins

Laugardaginn 5. desember voru haldnir jólatónleikar hjá kórnum Draumaraddir norðursins í Blönduóskirkju.

Þeir byrjuðu klukkan fimm og voru til sex. Draumaraddir norðursins er kór sem stelpur frá Blönduósi, Húnavöllum, Hvammstanga, Sauðárkróki og Skagaströnd eru í. Alexandra Cherneshova er stjórnandinn og Elínborg Sigurgeirsdóttir er píanóleikarinn.

Sungin voru tíu jólalög til dæmis Jólin alls staðar og Yfir fannhvíta jörð. Þá sungu stelpurnar lagið Draumaraddir norðursins.

Í Draumaröddum norðursins eru um það bil fjörtíu stelpur en aðeins einn strákur sem syngur einsöng. Kórinn hefur nú farið í tónleikaferð og hélt tónleika á Hvammstanga, á Blönduósi og Skagaströnd en tónleikarnir á Sauðarkróku féllu niður vegna veðurs og verða 12. desember næst komandi.

Tónleikarnir í Blönduóskirkju heppnuðust vel og margir mættu til að horfa á kórinn og ég mæli með því að mæta á tónleikana hjá þeim.   

Dagbjört Henný, 8. bekk

Nýtt prófasnið í unglingadeild

Í unglingadeild eru kennarar að prófa nýja prófa aðferð og mun það vera þannig að öll prófin sem að verða tekin eru öll í einu hefti þ.a.e.s. danska, íslenska, enska, samfélagsfræði, náttúrufræði og stærðfræði.

Prófin verða afhent á þriðjudagsmorgun og fá nemendur að skoða þau og vinna eins og þeir geta. Prófatíminn sem nemendur fá er frá kl. 8-11, með löngu frímínútum sem eru kl. 09.20-09.40 sem er venjulegur tími í frímínútum.

Eftir að venjulegur tími er útrunninn afhenda nemendur prófið og fá það svo aftur næsta dag. Svona verður fyrirkomulag prófana sem fara fram næsta þriðjudag, miðvikudag og fimmtudag.

Eins og venjulega má ekkert skrifa hjá sér úr prófinu en það má leggja allt á minnið og reyna að muna og læra betur heima eftir að prófið er afstaðið.

Frá kl 11.10-12.30 hafa nemendur leyfi til að spyrja fagkennara um leiðsögn og upplýsingar.

Engin hjálpartæki eru leyfileg nema ritföng og vasareiknir.

Eins og í fögunum eru kennararnir Anna Margret, Berglind, Höddi, Lilja og Ragga.

Árný Dögg 9.bekk.

Aðventuhátíð

Þann 6. desember klukkan 16:00 var messa í kirkjunni og strax á eftir henni var kveikt á jólatrénu sem stendur nú fyrir utan kirkjuna.

Í messunni sungu auk kirkjukórsins, krakkar frá leikskólanum Vallabóli og Barnabæ, einnig sungu krakkar frá Húnavallaskóla. Lúðrasveit Austur - Húnavatnssýslu spilaði tvö lög og síðan gengu fermingarbörn með kerti um kirkjuna og sungu Bráðum koma blessuð jólin.

Þegar messan var búin var kveikt á jólatrénu sem kemur frá Gunnfríðarstaðarskógi en er gjöf frá vinabæ Blönduóss í Noregi, Moss.

Margir krakkar og fullorðnir söfnuðust saman, mynduðu hring utan um tréð og sungu jólalög. Þá mættu jólasveinarnir og gáfu krökkunum mandarínur við mikinn fögnuð.

Birta Ósk, 8. bekk

 

Jólanöldrið

Nú þegar styttast fer að jólum byrja alls konar athafnir hjá fólki.

Það þarf að þrífa og baka, setja upp jólaseríur, helst þrjá hringi í kringum húsið. Það þarf að velja jólamatinn og sjá til þess að hann sé til, sumir sjóða niður rófur og einhverjir græna tómata, húsin eru skreytt hátt og lágt.

En til hvers í ósköpunum spyr ég?

Sumt er alveg gott og gagnlegt en annað er bara algjört rugl, að mínu mati. Það er allt í lagi að þrífa húsið, það er líka voða venjuleg athöfn en að þurfa að binda það við jólin, og svo líka vorin, er gott dæmi um leti finnst mér.

Baka smákökur - það getur verið góð samverustund, bæði að baka þær og borða, en enn og aftur að baka þær bara í kringum jólin er leti að mínu mati, hver vill ekki borða smákökur úti í sólbaði?

Jólaseríur - eitthvað sem ég hef aldrei verið sérlega hrifin af, sérstaklega þegar þær snúa út í garð og sjást ekki frá götunni. Jólaseríurnar eru bara settar upp til að gleðja augað, sanna sig fyrir nágrönnunum og í leiðinni að tjá og sýna hversu smekklegur maður getur verið. Þetta er bara allt of skært og á eftir að skemma augu einhvers einn daginn og það er sett allt of mikið af þessu á flesta staði.

Þá er það næst að hafa einhvern sérstakan jólamat, halda í hefðirnar eða skapa nýjar hefðir varðandi hvað er í matinn. Jólamaturinn er bara vesen að mínu mati. Sá sem eldar stendur í eldhúsinu allan daginn, bókstaflega! Til hvers að vera leggja allt þetta sig fyrir nokkra daga af afgöngum, eða jafnvel yfir áramótin? Ég er búin að tuða um það oft og mörgum sinnum að ég vilji helst bara panta pítsu og vera í náttfötunum.

Fólk leggur það á sig að vera vel til fara á jólunum. Ný jólaföt og kannski skór líka. Kvenkynið, líklega í meira mæli en karlkynið, málar sig líka í framan og leggur það á sig að vera sem „fallegastur" þegar hátíðin gengur í garð. Þetta er algjör óþarfi og það er ekki einu sinni þægilegt að vera stífmálaður, í sumum tilvikum, og í stífum blúndukjól með pífum og ég veit ekki hvað og hvað. Náttfötin eru miklu þægilegri og öllum líður líka vel í þeim. Jólin mín í framtíðinni verða haldin hátíðleg á náttfötunum!

Þá að lokum að því að skreyta húsið. Þú þarft að taka það niður aftur, því þá að setja það upp? Ef það er til að skapa stemminguna þá er það ekki rétti jólaandinn að mínu mati, þó að ég sé hræðilega neikvæð varðandi jólin.

Jólatré er þó eitthvað sem ég er samþykk, það þarf að vera einhver staður til að geyma pakkana hjá.

Það sem ég tel vera hið rétta jólaskraut er einna helst kerti. Slökkva ljósin í skammdeginu, kveikja á nokkrum kertum og hlusta á rólega tónlist, mögulega jólatónlist en hún er eitthvað þó sem heillar mig ekki.

Jólatónlistin snýst oft um gjafir og gleði, en ætti að vera meira um ást og umhyggju þó að þau detti alveg inn svona á milli tíða. Jólatónlistin á að skapa einhvert svo rosalega skemmtilegt andrúmsloft en eina það sem þau gera er að krakkarnir fara á milljón útaf spenningi og varla er hægt að nota hana Grýlu gömlu á það. Jólatónlistin á að vera seiðandi og róandi, ekki að ýta undir alla þá spennu og líka stressið sem á það til að byrgjast upp hjá fólki.

En best er að enda þetta á þennan veg

Gleðileg jól og farsælt komandi ár.
Jólakveðja,
sú sem skilur Trölla (Margrét Ásgerður 10. bekk)

 

Vetrarsnjór - vangaveltur

Þegar snjórinn byrjar að falla er fólk oft með mjög mismunandi skoðanir.

Ungu fólki og börnum finnst líklega gaman að það sé loksins kominn snjór eftir sumarið, þó svo að það sé stutt. Krakkar fara þá oft út að leika sér í snjónum, t.d. í snjóstríði, renna sér á snjóþotum og að búa til snjókarla og snjóhús.

Eldri krakkar hafa kannski ekki alveg jafn gaman að honum og finnst hann ef til vill oft flækjast fyrir sér, en finnst samt gaman að leika sér í snjóstríði og jafnvel á vélsleðum, ef þeir hafa aðgang að svoleiðis tækjum.

Fullorðnir hafa líka mjög misjafnar skoðanir á snjónum. Sumum finnst þetta bara skapa annars óþarfa vinnu við að moka gangstéttar og innkeyrslur og að skafa af bílnum. Aðrir hafa mjög gaman að honum, og fara kannski með vinum og fjölskyldu í vélsleðaferðir og bara út að leika sér.

Að mínu mati er það eins með gamalt fólk, þar sem að aukavinnan getur líka verið mjög erfið fyrir það, eins og að moka gangstéttir, en það getur líka oft fundið einhvern annan til að gera það fyrir sig.

Sumir geta samt haft gaman af snjó, og finnst hann kannski líka fallegur og að hann hafi fríkkandi áhrif á umhverfið.

Sindri Rafn, 10. bekk

Facebook dagar

Undanfarna daga hefur mikið verið fjallað um alls konar daga sem eitthvert fólk hefur samið bara uppúr þurru og sett á facebook.

T.d. má nefna að þarsíðasta föstudag var svonefndur "kick a ginger day", sá dagur snerist um að sparka í rauðhært fólk.

Ekki var sparkað í marga hérna í skólanum líklega vegna fárra rauðhærðra manneskja en það var gert samt, en aðeins á þessum degi. Reglurnar voru þær að það mátti bara sparka, ekki sýna neitt annað ofbeldi.

Síðan hefur einning verið "make love to a ginger day".

Á Pressunni (http://www.pressan.is/) var fjallað um að skólastjóri nokkur hafi sent bréf til foreldra rauðhærða barna um það að hann hafi haft áhyggjur af ofbeldi gegn rauðhærðum vegna þess að krakkar Vestanhafs höfðu þolað mikið ofbeldi þennan dag.

Á föstudaginn verður svo "hug or kiss blondie day!

Maður hugsar nokkuð útí það, hlýða unglingar facebook í einu og öllu?

Það er spurning dagsins.

Guðbjörg, 10.bekk.

Dagur íslenskrar tungu

Við spurðum íslenskukennara allra bekkja hvað þeir gerðu á degi íslenskrar tungu og svörin voru svona:

Fyrsti bekkur og þriðji bekkur unnu með ljóð. En annar bekkur lærði um Jónas Hallgrímsson, og skrifaði hálft ljóðið Um hana systur mína og myndskreytti.

Anna Margret kennari fjórða bekkjar las fyrir þau ljóð og síðan ræddu þau um það og gerðu ritun.

Fimmti bekkur er ekki búin að gera neitt í sambandi við dag íslenskrar tungu en þau eiga eftir að gera eitthvað spennandi.

Sjötti bekkur lærði líka um Jónas Hallgrímsson, nemendur bekkjarins fundu eitt ljóð og lásu það upp fyrir bekkinn ásamt því að skoða það sem um Jónas er sagt á internetinu.

Sjöundi bekkur var með stöðvar og á stöðvunum voru ljóð, málshættir,orðtök, lesskilningur og ritun.

Unglingadeildin fór um bæinn og tók myndir af einhverju og á þeim átti á vera einhver íslenskur texti. - svokölluð götuljóð. Hugmyndin var fengin af vef Námsgagnastofnunar.

Myndin með greininni er mynd Brynhildar Unu í 10. bekk.  

Birta Ósk og Dagbjört Henný, 8. bekk.